Нұрсұлтан Назарбаев коронавируспен күреске 200 миллион теңге бөлуді тапсырды

Қазақстан Республикасының Тұңғыш Президенті-Елбасы қоры елімізде коронавирустық инфекцияның таралуына қарсы әрекет етуге 200 миллион теңге бөледі.

Қаражат жағдайды жедел түрде қадағалап отырған Нұрсұлтан Назарбаевтың тікелей тапсырмасы бойынша бөлінуде.

«Бүгінде Қазақстанда эпидемияға қарсы іс-шаралар толық көлемде жүзеге асып жатыр. Бұл әрекеттер қазіргі ахуалға сай және дер кезінде қолға алынды. Мемлекет теңдессіз шараларды қабылдап отыр. Қауіпті індетпен күресте отандық бизнес те қолдан келгенше көмектесуде. Мен бұл бастаманы қолдап, әлеуметтік жауапкершілік танытуға және біздің қоғамның бірлігін көрсетуге шақырамын. Біз барлық сынақтан сүрінбей өтеміз. Біз біргеміз!» – делінген Қазақстанның Тұңғыш Президентінің тапсырмасында.

Бөлінген қаражат Нұр-Сұлтан мен Алматы қалалары әкімдіктері арасында теңдей үлестіріледі. Қаржылық көмек пандемияға қарсы күреске жұмылған медицина қызметкерлеріне сыйақы беруге, қосымша медициналық бетперделер мен дезинфекциялау құралдарын сатып алуға жұмсалады. Сондай-ақ, қаражаттың бір бөлігі елордадағы балалар үйлері мен мамандандырылған ауруханаларды азық-түлікпен қамтамасыз етуге бағытталады.

Пікір үстеу

Э-пошта мекенжайыңыз жарияланбайды.