Қарағандыда COVID-19 екі жаңа оқиғасы тіркелді – жұқтырғандар карантинде болған

Бүгін Қарағандыда коронавирустық инфекция (COVID-19) тағы екі адамда расталды. Олар Франциядан Минск – Нұр-Сұлтан рейсімен 18 наурызда ұшып келген. Екі әйел қонғаннан кейін бірден карантинге жатқызылған.

Пациенттер бір-біріне жақын туыс болып келеді. Оларда вирустың болуы зертханалық талдаулар арқылы расталды. Қазіргі уақытта науқастардың жағдайы қанағаттанарлық деп бағаланады.

Рейстің қалған жолаушыларында 26 наурызда коронавирус белгілері табылмады.
Медициналық персонал санитарлық қауіпсіздіктің барлық шараларын және қажетті хаттамаларды сақтауда.

Бүгінгі күні карантинде 314 адам тәулік бойы бақылауда. Бұл 1А санатындағы елдерден оралған немесе шартты түрде жұқтырған адамдармен байланыста болған азаматтар. Тағы 152 адам үй жағдайында карантиннен өтуде.
Бұған дейін Қарағандыда коронавирустық инфекция жұқтырған екі адам анықталған болатын. Бүгінгі күні олардың жағдайы қанағаттанарлық деп бағаланады.